1 Thessalonians 4
Liu ae in Falaes God
1Foron tualik kemtuul, igii e nenge orek sabin, kemtuul ka fausum ta gam ini matngan liu ae gamen liu ini, isi gamek falaes God, arae tom gam mi la lo. Ma igii kemtuul ka sising gam, ke kemtuul ka farakrakai gam na asa Iesu Kumguui, isi matngan liu kimi ae, ik lala kuum. 2Wara le gam ka usum tah na foron fafausum ae kemtuul fausum ta gam ini. Foron fafausum ae i la tom sing Iesu Kumguui.3God i ier le liu kimi in kalkaluu na mata. Pesu, gamen fin koseng foron sinangun puur. 4Temtem tikii lo gam in foim rakrakai isi in ti kale foron wolwol laulau i aptih la na balmi ▼, isi sinangun kalkaluu ke sinangun bulat ik kiis na liu kimi, 5isi gong gam mi na rakrakai na wolwol na sinangun puur, arae fanu ae biil ri usum lo God. 6Gong tikas lo gam i tel sinangun puur ini antu nenge kaltu ae i tualik na asa Iesu. Male in tel u arae, ke in fambal tualik. Kemtuul ka use ta u ke kemtuul ka fanau ta gam le, Kumguui in ta fangungut sing fanu ae ri tel matngan sinang arae. 7Wara le God biil i tawi pes ta kerer le keren tel sinang laulau, biil. I tawi pes ta kerer isi keren liu ini matngan liu ae i kalkaluu. 8Pesu le tikas i ongen ufu fafausum igii, biil i ongen ufu fafausum ken kaltu, biil. I ongen ufu fafausum ke God ae i ta Tanwa Kalkaluu la usuf gam.
9Biil i fasih kemtuul en sisiit sabin usuf gam na famais kimi usuf foron tualik gam. Wara le God tom ka fausum ta gam isi gamen famais faliu ini gam. 10Tekentu kanaka, gam ier kanaka isi foron tualik gam ae na foron falifuh tikii na Masedonia. Isau le kemtuul ka sising gam isi famais kimi ik kuum lalala.
11I rokap le gamen ier kanaka isi mi na foron matngan sinang aragii: Gamen liu ini siaroh ke gong gam fakau paklu gam na tier ken nenge kaltu. Isau le gamen foimnge inen ami ini liumi arae kemtuul fas ta gam. 12Male gamen tel u arae, ke fanu ae biil ri unune, rin bulat lo gam ma biil sabin gamen tapiek arae foron tom fapare.
Kumguui in fis sabin
13Foron tualik kemtuul, kemtuul ier le gamen usum na fanu ae ri ka met tah. Ke gong gam mamais arae fanu ae biil ri unune le fanu ae ri ka met tah, rin aptih fis sabin. 14Kere unune le Iesu i met tah ke ka aptih fis sabin. Pesu kere ka unune le fanseh ae ri unune lo Iesu, ma ri ka met tah, God in faptih fafis ri isi rik la turim tura Iesu, aunbiing in fis sabin. 15Foron orek igii kemtuul fas gam ini, i e orek ke Kumguui tom. Kerer ae keren liu papang na biing ae Kumguui in fis sabin, biil keren famu lon fanseh ae ri ka met tah. Biil. 16Wara le Kumguui tom in puh tinbae na Kukulii, ini rakrakai na orek, ke famfamu ken foron angelo ik orek, ma kinen tafih ke God ik ninih, ma fanseh ae ri ka met tah ini unune lo Iesu Karisito, rin aptih famu. 17Namih, kerer ae kere liu biitom, rin kep turim kerer tura ri na laukaf ubase na mua isi kerek tafe Kumguui na mua. Isi kerek kiis fitliu turim tura Kumguui. 18Pesu gamen farakrakai temtem tikii lo gam tom ini foron orek ae.
Copyright information for
TGG